لحظه لابد ان نتوقف عندها للمحافظه على المنتدى

[الـ@ـاجري]

السلام عليكم ورحمة الله وبركاته

شد انتباهي الانسحبات لـ اخوان اعزاء لنا اعلنو عن انسحابهم في مواضيعهم او الذين لم يعلنو
مدري هل هناك مشكله في المنتدى او هل هناك مشكله تواجههم نحن لا نعرفهاا
اتمنى من الجميع العمل على اعادة المياه لمجاريهاا لان انسحاب او ابتعاد اي شخص
راح يكون خساره على الجميع حتى لو كانت مشاركاته قليله
فـ يشهد علي الله ان هذا المنتدى عرفني على اخوان اعزاء علي اتشرف في معرفتهم
من داخل قطر او خارجهاا
واكثر من هذا كله اني تعرفت او عرفت ان هناك من هو مني وفيني وعنده من الحلال الطيب
وانا لم اكن اعرف او لم اشاهده من زمن بعيد وكل هذا من خلال المنتدى

ارجو من الاخوان الاداريين والاخوان الاعظاء
العمل على تلاشي الخطاء اذا كان هناك اخطاء او تصحيح المشكله اذا كان هناك مشكله
لان في الختام هذا في مثابت البيت الواحد لنا واقسامه مثل الغرف نتجول من غرفه لغرفه


ولكم تحياتي

[ViP]

عزاا الله انك صدقت يالهاجري.....

وانا مستغرب حتى لو اهناك حزازيات بس بعد الواحد لابد انه يكون اكبر من ذي الحزازيات
وعمر الانسحابات مكانت حل للمشاكل وان وجدت اي مشكله المفروض انهم يقولون مع ذكر الاسباب حتى نعالج الموضوع وان كان حد اخطااا عليهم مالهم منا الا طيبة الخاطر وابدن بلي يامرون به
والواحد يحكم عقله وخاصه عند اتخاذ اي قرار

وياليت الاعضاء الي اعلنو انسحابهم انهم يردون واذا كان في خطرهم شي يقولونه (( والكلمه الي تستحي منها بدها )) والاخوان في الاداره بيض الله اوجيهم مهب امقصرين في شي والله يعطيهم العافيه

[بوعبدالله]

صحيح كلامك اخوى الهاجرى لزم تكون فى وقفه من الجميع

[القانون]

الـ@ـاجري : اسمع مني وانا اخوك انا لاحظت المنتدى وانا مالى مصلحه في الكلام اللي باقوله وانا مالى حلال في الاصل لكن محبة فيكم في ذمتي ، لكن اللي لاحظته وهو مش مقبول من بعض الاخوان سوالف تدور وايد (احزاب - مجموعات ) وين قاعدين في مدرسه ابتدائيه ؟ والاحزاب طلعت من المجاملات ، انا نادر ماشفت في المنتدى واحد مايجامل لو باحط لك نسبه في المنتدى عن المواضيع اللي مافيها إلا خصم وحلال طيب وهو حلال عادي يمكن 80 % ، ممكن تقولي ايش الاستفاده اللي يلقاها اللي تعبان على حلاله صح وحلاله بالفعل زين ، المشكله لو قلت عادي زعلو لاعادي ودون العادي ياخي انت مابينك وبينه اي غل علشان تزعل، الرجال ناصح لك ويبيك تغير للأفضل ولنفرض ان الرجال متحامل عليك ، مايضرك إذا كتبت ( وجهة نظر واحترمها ) وخله بإنتقاده وخلك واثق من نفسك ومن حلالك ، وياجماعه لحد يزعل مني هالمنتدى منكم ولكم تستفيدون منه ، ويوم تغير جو المجاملات في الاقسام الثانيه صار بين الاعضاء ود ومحبه وكلن يفقد الثاني إذا ماشارك ، اسمي القانون --> ماعرف المجامله العدل عدل والمايل مايل وسلامتك

[روح قطر]

بيض الله وجهك أخوى الهاجرى على هالبادرة الطيبة

اللي تدل عن حسن تربيتك وطيب أصلك

ورايتك بيضا من صوب الكل

بالنسبة للأنسحاب الأعضاء بدون سبب أو بسبب

هذا شي لابد أن الأدارة هي اللي تنتبة لة

أحنا كأعضاء علينا بالنصيحة والتوجية اذا كانت وجهه نضرنا صحيحة وفي محلها

وما فية دخان بدون نار

يعني اللي بينسحب ماراح ينسحب بدون سبب

واذا بدر مني اى غلط من ناحية مزحي يشهد الله على

ان مالى اى هدف الا لتلطيف الجو بينا

ومايكون منتدانا منتدى رسمي

يعني نكون أسرة واحدة تجمعنا المحبة والأخوة والقلوب النظيفة

وعلى فكرة أحنا معدودين على الأصابع وعددنا بسيط مقارنة بباقي المنتديات

بس عندنا شعبية وخواطر وسيعه وناس تاخذ وتعطي معانا بالمناقشات

بارك الله فيك أخوى الهاجرى وأشكرك على أهتمامك

وياعل منتدانا عامر بمنهو مثلك وشرواك

من غير قصور في البقية

أختك أم حمد

[الـ@ـاجري]

الاخوان
ابو محسن + بوعبدالله + القانون + روح قطر
الله لا يحرمني طلتكم ولا مشاركتكم
وشاكر لكم التفاعل وابداء الراي لما فيه مصلحه لمنتدانا العزيز

شاكر لكم مره اخرى وان شالله الاخوان الاداريين راح يرجعون الامور لنصابهاا

[روح قطر]

أن شاء الله

ترجع الأمور مثل ماكانت واحسن

ونشوف أبداعات أكثر من أخوانا القديمين قبل الجدد

[العنبري]

الـ@ـاجري : اسمع مني وانا اخوك انا لاحظت المنتدى وانا مالى مصلحه في الكلام اللي باقوله وانا مالى حلال في الاصل لكن محبة فيكم في ذمتي ، لكن اللي لاحظته وهو مش مقبول من بعض الاخوان سوالف تدور وايد (احزاب - مجموعات ) وين قاعدين في مدرسه ابتدائيه ؟ والاحزاب طلعت من المجاملات ، انا نادر ماشفت في المنتدى واحد مايجامل لو باحط لك نسبه في المنتدى عن المواضيع اللي مافيها إلا خصم وحلال طيب وهو حلال عادي يمكن 80 % ، ممكن تقولي ايش الاستفاده اللي يلقاها اللي تعبان على حلاله صح وحلاله بالفعل زين ، المشكله لو قلت عادي زعلو لاعادي ودون العادي ياخي انت مابينك وبينه اي غل علشان تزعل، الرجال ناصح لك ويبيك تغير للأفضل ولنفرض ان الرجال متحامل عليك ، مايضرك إذا كتبت ( وجهة نظر واحترمها ) وخله بإنتقاده وخلك واثق من نفسك ومن حلالك ، وياجماعه لحد يزعل مني هالمنتدى منكم ولكم تستفيدون منه ، ويوم تغير جو المجاملات في الاقسام الثانيه صار بين الاعضاء ود ومحبه وكلن يفقد الثاني إذا ماشارك ، اسمي القانون --> ماعرف المجامله العدل عدل والمايل مايل وسلامتك

اخوي القانون مب عيب ان الواحد يجامل بس بشرط مايطير الشي سما والمجامله ترى معظم الوقت مطلوبه ومب شرط ادخل على الشخص بطريقه هجوميه واعذرب حلاله واقدر اكتفي بكلمة الله يبارك لك بحلالك ولا امدحه وبيفهم ان الشي ماعجبني او ان مب المستوى اللي يدخل مزاجي ولما اسال الناس عن رايهم اكيد بارضى لو قال عن حلالي عادي او اقل من عادي بس بشرط ان مايقول هالكلمه ويروح ومايرجع حق الموضوع مره ثانيه لاني اكيد باناقشه وباساله عشان استفيد منه وممكن تكون مجرد اختلاف في الذوق يعني اختلاف على ربشه او شهبه او عطرا وكللن له ذوقه والراي ماينفرض بالغصب والاذواق تختلف لاني مب شرط احب الشعره السوده والرباش المحدد مثل الناس ومب معناها اني ماشوفها حلوه بنفس الوقت وشي ثاني لما واحد والله لو يكون حاط فارسيات وينتقد حلالي للانتقاد نفسه لاني طلبت الراي غصبن عني باقبل رايه بس بشرط مايرجع يعرض حلاله ويمدحه ويطيره سما ويكون الفرق بين حلالي اللي انتقده من قبل وحلاله واضح واعتقد انت فاهم قصدي وتكلمت معاك في هالموضوع من قبل وترى حتى النصيحه لها اسلوب لان هني ساعات انت ماتعرف من ورى الشاشه وشنهي نفسيته ويمكن عارف الموقف اللي صار من قبل مع بو ناصر وانا ماكنت عارف انه هو حزتها وكان قصدي امنع مشكله وانت انتقدتني والحين يوم عرفت انه بوناصر الريال اللي انا خابره واعرفه انا بنفسي طلبت انتقاداته ولي الحين اطلبها وباتم اطلبها وباناقشه فيها اذا كانت مسالة اختلاف اذواق وفي الاخر اكيد اني باستفيد منه ومن مناقشته حتى لو اوصلت مرحلة المعاياه لانه في الاخر بوناصر اللي انا وياك انعرف انه راعي الباع الطويل واللي انا تلميذ من تلاميذه

[العنبري]

اخوي الهاجري اشكرك على هالبادره الطيبه منك اللي تبين حرصك على المنتدى وانا اقولك والله ان من اكبر المكاسب لي في هالمنتدى اني عرفتك وعرفت شرواك
اكيد يا اخواني اي مكان بنلقى فيه اختلاف وجهات النظر وكل ما احتكينا في بعضنا لازم بتصير زمرات وهالشي متوقع نفس الاسره في البيت كل ماكبرت وزاد احتكاكهم لازم تطلع بينهم مشاكل واحنا هني مثل ماتفضلت اخوي الكبير اسره وحده وكبرت وقاعده تكبر يوم عن يوم بس لازم تكون عقولنا اكبر ومثل ماقال اخوي بو محسن اللي يبي ينسحب المفروض يبين سبب انسحابه حق الجميع عشان اللي مزعله يعرف غلطته لو كان في الشغله زعل وياما بزلات لسان مب مقصوده فرقت بين عرب والطرف المغضوب عليه يا غافلين لكم الله ولو درى حزتها كان المشكله انحلت بكلمه اطيب الخاطر واي واحد ينسحب ومايبين حق الجميع سبب انسحابه ويعطيهم مجال يناقشونه معناها يبي يبين حق كل الناس ان المنتدى ماينفع وان ماوراه الا المشاكل وصدقوني هالشخص ماهمته مصلحة المنتدى من وجهة نظري المتواضعه ولو صج مهتم ماطلع بهالطريقه وخلاها عايمه كللن يفسر طلعته على كيفه وياكثرهم اللي يحبون يفسرون واترك التعليق والراي لكم

[روح قطر]

جزاك الله خير أخوى العنبرى على هالكلام

الصراحة

كفـــــــــــــــــــــيت ووفيـــــــــــــــــــــــــــــــــــــــت

بيض الله وجهك من مسراك لين ملفاك

[القانون]

والله يالعنبري ياحته من البي ، المجامله كلمه وحده من عرفناها ( يافلان لاتجاملني ) اما إذا بتسوي تجزئه للمجامله يعني لاتمدح وايد وإلا لاتذم وايد نتفق على كلمة ( حلال مبروك) وبس ، اما بتطلب الراي تحمل الرد الزين زين ، والوسط وسط ، والسكين سكين

[العنبري]

والله يالعنبري ياحته من البي ، المجامله كلمه وحده من عرفناها ( يافلان لاتجاملني ) اما إذا بتسوي تجزئه للمجامله يعني لاتمدح وايد وإلا لاتذم وايد نتفق على كلمة ( حلال مبروك) وبس ، اما بتطلب الراي تحمل الرد الزين زين ، والوسط وسط ، والسكين سكين

اخوي القانون انا متفق وياك على كلمة حلال مبروك والله يبارك لك في حلالك وهذي اللي قلته من قبل في كلامي بس من وجهة نظرك حتى لو طلبت الراي مالي حق اناقش صاحب الراي واعرف اسباب رايه واستفيد ؟؟؟؟

[القانون]

تقدر بس ماتكون معصب وتكون عادي عادي عادي يابوفهمي

[بوعبدالله]

انا اقول بكره فى المكتب عندكم دباسات وملفات وقلامه والطولات والكراسى عندكم بعض

[الـ@ـاجري]

الاخوان
العنبري + القانون

شاكر لكم مروركم وحرصكم على الارتقاء بالمنتدى
وشاكر لكم تفاعلكم الغير غريب عليكم

بنسبه للنقه الي ذكرها اخوي القانون
انا معه ان الواحد مدام حط له صور وطلب الراي انه لا يزعل من الاراى الي ممكن ماتعجبه
ولكن هل كلمة (( عادي او اقل من عادي او يصلح للسكين او ابحث عن الافظل )) تعتبر راي منصف
مدام لم يوضح شنهو العادي او الاقل من عادي
يا جماعه فيه ناس وهم كثير والله همهم انهم يعملون بلبله في المنتديات وبين الاعظاء
اذا كان عندك راي في الصوره الي امامك ليش ماتوضح لصاحب الصوره شنهو القصور فيهاا
ليش مدام قلت عادي انك ماتذكر شنهو العادي في المعروض امامك علشان صاحبها يتعلم ويستفيد
من الراي وليس العكس ..

وفي الختام اشكركم مره اخرى وهل معنى كلامكم هذا ان الاخوان المنسحبين او المبتعدين
انه زعلانين من هذي النقطه ...

ولكم كل الشكر

[بوناصر]

السلام عليكم ورحمه الله وبركاته
اخواني اعضاء منتدى حلال قطر كل الشكر لكم على ماتبذلونه من جهد للارتقاء باسم المنتدى عاليا ويشهد الله انني حين دخلت المنتدى وسجلت فيه وانا لا اعرف اي شخص منكم وحين دخلت وسجلت في هذ المنتدى لم اشارك فيه حتا رأيت مايوجب علي المشاركه فيه وكنت حينها خائفا من هذه المشكله ان تقع وهذه اول مشاركه لي.
http://www.7alalqatar.net/vb/showthread.php?t=79&page=2
ولم تقتصر مشاركتي الى هذ الحد ويعلم الله انني لم ادخل هذ المنتدى الا لسبب واحد وهو الارتقاء به وأذا لم استطع ان احقق مادخلت من اجله سوف اخرج منه بكل ود واحترام واول ارتقاء للمنتدى هو التآخي وان يحترم الصغير الكبير وان لايبخل اي عضو بالنصح للعضو الاخر وان ترتقي الردور للهدف المرجو والبعد عن المجاملات في كل المواضيع وتقبل النصيحه من الكل والبعد عن الشلليه وهذ ليس بالشيء السهل لان هذ يعتبر مكان عام منتدى يدخل اليه الكل من صغير وكبير من ذكر وانثى من عاقل وقليل عقل من طيب وخبيث وهنا يكمن دوركم ك اعضاء في الادارة ومتابعه المواضيع وحذف كل مايسئ للعامه قبل الاعضاء والاداره ولا تنسو ان ارضاء الناس غايه لاتدرك وانا لا الوم اي شخص منكم لاني متفهم لكل ماتعانونه من صعوبات ولكن هذ لايمنع ان ادلو بدلوي بما اراه نافعا لي اولا ولكم ك اخوه اتشرف بمعرفتهم ومنتدى يحمل اسم بلدي .
1_ من السهل ان تزعل اخيك بكلمه ومن الصعب ان ترضيه بالف كلمه.
2_كل اناء بما فيه ينضح وهذ لايغفله اي عاقل وتستطيع من مشاركاتك ان توضح شخصيتك وتفرض احترامك على الجميع وبكل سهوله.
3_عامل الناس بما تحب ان يعاملوك.
4_ليس بالعيب ان تخطئ ولكن العيب الاستمرار في الخطاء.
وأن شالله لن تكون هذه اخر مشاركه لي بعد ما علمت ان لي بينكم اخوه اعرفهم من قبل لا ادخل واخوه تشرفت بمعرفتهم اتمنى اني بينت بعض الامور التي قد تسبب الفرقه والخلافات الله يبعدها عنا وعن منتدانا واتمنى من الجميع ان لايجعلو اي موضوع او اي خلاف ان وجد ان يتطور وكلي ثقه بكم جميعا في حل اي مشكله حتا لو كانت صعبه مع تمنياتي لكم جميعا بالتوفيق وتجاوز اي خلاف في سبيل انجاح هذ المنتدى الاكثر من رائع ولولا العثرات لما كان الوصول الى القمه تقبلو مني ماذكرت .
اخوكم . بوناصر

[العنبري]

اخوي بو ناصر ماعندي تعليق غير انك كفيت ووفيت وبيض الله ويهك وانا اشهد انك مكسب كبير حق هالمنتدى المتواضع اللي ان شالله قاعد يكبر يوم عن يوم بفضل مجهودكم واهتمامكم وهذي هي الهقوه فيكم

[العنبري]

وفي الختام اشكركم مره اخرى وهل معنى كلامكم هذا ان الاخوان المنسحبين او المبتعدين
انه زعلانين من هذي النقطه ...

ولكم كل الشكر

اخوي الكبير الهاجري اللي دوم اتعلم منه واستفيد ورايه يهمني في كل الاحوال
ابشرك انها سحابة صيف وبتعدي وهي مشكله انا اسأت التقدير في حجمها وطريقة علاجها وانا اتحمل كامل المسؤوليه ومحد من الاداريين والمشرفين يتحملها معاي لان مالهم ذنب فيها واوعدكم اني اشوف لها حل وحق معظم المشاكل اذا ماكانت كلها وابي همتكم معاي لان يد وحده ماتصفق

[ابوجديع]

كبير ولله يا(( الهاااجري )) يامحلف علي هذا الكلام الذي إذا دل يدل علي أخلاقك العاليه ..

ويا (( االعنبري )) هد أعصابك لأنك أنت ملح المنتدي وأخاف إنك تعصب ثم يرتفع عندك الضغط فماله داعي لأننا نخاف عليك ..

(( رررروح قطـر )) لا بالعكس ماطلع منك ألا كل خير لأنك أستأذنتي من قبل وعداك اللوم ..

(( ااالقانون )) نكن لك كل أحترام علي أسلوبك وطريقتك في التعامل ولكن المجاملات في بعض الأحيان مطلوبه ومثلك عارف نوع من أنواع التشجيع ودايمآ الواحد يحب يمشى الأمور ولا يحبط ..

(( بوناصر )) كلامك علي العين والراس وكلام واحد عاقل ويحب هذا المنتدي علشان قطر وصدقني يابوناصر أنا واحد من الكويت ودخلت هذا المنتدي وتعرفت عليهم من غير لا أعرفهم ولكن حسيت أنني منهم وفيهم ويتصلون فيني ونتواصل لدرجة ودي أن أزورهم وأتعرف عليهم أكثر وأكثر كل هذا بسبب المنتدي والناس إللي مثلك وشرواك ..


أأأخوكم// أأأبوجديع

[الـ@ـاجري]

الاخوان
ابو ناصر + العنبري + ابو جديع

شاكر لكم مروركم ومشاركتكم
والله يجزيكم خير على اثراء الموضوع بالكلالم الطيب والنصيحه الطيبه
وصدقوني يا اخوان ان ماتكلمنا في ها النقطه الا الهدف منها ان نكون
اسره واحده وان يكون منتدى حلال قطر غالي على الجميع

العنبري
شكرآ لك على ها الكلام الطيب والله يجزيك خير على ها الشجاعه والاعتراف بالخطاء
وانت عزيز وغالي وكبرت في عيني بعد ها الكلام الطيب
وان شالله بمجهودك ومجهود الاخوان الاخرين نشوف اخوانا بينا في اقرب فرصه

شكرآ لكم جميييع