جدول تحصينات

[لفان]

كل عام و أنتم بخير
يادكتورنا الفاضل لو تكرمت علينا بجدول لتحصينات المطلوبه للاغنام و الماعز مثل فكرة تقويم الاغنام بالكميه و الفتره بين كل دواء و يكون مثبت لتعم الفائده للجميع و بالاخص المبتدئين0
و الله يكثر من أمثالك
أخوك لفان

[راعي كحيله]

ادخل على الرابط وربي يوفقك ويبارك لك بحلالك

http://www.7alalqatar.net/vb/showthread.php?t=4440

[لفان]

مساك الله بالخير ياستاذي الفاضل و ربي يكثر من أمثالك
مشكور عالرد السريع و لاكن هالتحصينات بس للغنم الاعوارض و شلون التطعيمات للخرفان و الله يطول في عمرك
وإذا ماعليك أمر راح أتصلك اليوم ياطويل العمر
أخوك لفان

[دخان]

اخوي لفان اسمحلي بمداخلة
والمثل ايقول اسأل امجرب ولا تسأل طبيب
انا اول مابديت في تربية الغنم كنت حريص على التطعيمات
وما اخلي تطعيم الا وعطيته للحلال
بس المشكلة عندنا في قطر انه ادارة الثروة الحيوانية امقصرة ويانا
يعني ما يعلنون بالوسائل الاعلامية مثل الجرايد عن التحصينات اللي عندهم
واذا رحت لهم كلن ايقولك كلام اما ان التطعيم امخلص او انتهت فترة التطعيم
او اتجيهم تبي اطعم عن بورمح ايقولك لا التطعيم الحين عن الثمان امراض
ودكتور ايقولك تطعيم الثمان امراض كل ست شهور ودكتور ثاني ايقولك لا كل سنة
ودكتور ايقول التطتعيم يطرح اللي في البطن ودكتور ثاني ايخالفه
واذا بيطعمون للحلال تاخذ موعد بين العشر ايام الى شهر
و اذا ما عنك واسطة ايطرشون ممرض ايطعم مب دكتور
ويمكن ايقولون لك اشتر الدوا من برا واحنا بنطعم

هذه الثروة الحيوانية والتطعيمات
انجي للعيادات الخاصة
اتدش العيادة تبي تطعيم ايدبسونك باداوي ايخلونك امفلس لين اخر الشهر

اخيرا
اذا عنك معزا اهم التطعيمات لبورمح
واذا عندك ضان اهم التظعيمات الجدري

وفيه واحد من اهل الخبرة في الحلال نصحنى قال لا اتعود حلالك على التطعيمات
والحمد لله صارلي سنتين ما طعمت والحمد لله الامور طيبة
بس اهم شي العناية بالحلال مثل الطعام الجيد والمكان النظيف
وفي وقت الشتا اتحميهم من البرد قدر الامكان وخاصة المعزا
وتمنع عنهم الما في الليل والصباح الباكر
وفي الصيف اهم شي الظلال

واسمحلي على الاطالة


جميع الحقوق محفوظة دخان -2009

[لفان]

مشكور عالمداخله الطيبه والتحصينات من وجهة نظري أنها لازمه بمجمعات العزب لانها متراصصه جمب بعض والامراض تنتقل بسرعه والله و أنت صادق و انا أثني على كلامك عن الدكاتره و لك كل الشكر و التقدير
أخوك لفان