جديد ومحتاج نصايح

[محمد عبدالكريم]

السلام عليكم

انا هاوي جديد للمعز وتوني بادي اتعلم. عندي 30 راس ما بين صغار وكبار ومشكله (عارضيه, وعمانيه, وشاميه) كم المفروض احط من العلف؟
حاليا انا احط برسيم ربطه الا ربع الصباح وتقريبا 20 كيلو شعير العصر واحيانا احط خبز شوي والا تمر بس مو دايم. هل هذا كفايه لأن كل ما جاني احد قال الحلال جايع وانا احس انهم يتركون من الاكل بس بعدها بساعه يصايحون مره ثانيه, هل صحيح انا احط اكل قليل؟

سؤالي الثاني هل ممكن ان فحل عماني يطول يلقح عارضيه؟ لأن عندي عماني ومهدود معهم.

السؤال الثالث: كيف اعرف ان العنز صارف وكيف اعرف اذا مقروعه؟

اخر سؤال: كل كم اغسل حوض الماء؟ لأن في اغلب الاحيان انا بس ازيده ما افضيه واغسله.

اسف جدا على الاطاله بس اعذروني اخوكم الصغير ويبغى يتعلم منكم

[راعي كحيله]

محمد عبدالكريم
يا مرحبا بك بين اخوانك وربعك ونورت المنتدى بحضورك
اخوي محمد انت باي ديره؟
راعي كحيله
البحرين

[بوباسم]

محمد عبدالكريم

في البداية ياهلابك في مكانك بين أخوانك وربعك
وانشاء الله الأخوان ماراح يقصرون معاك

تحياتي

[محمد عبدالكريم]

السلام عليكم

شكرا على الترحيب. أخوكم من الاحساء

[ابوناصر القطري]

مرحبا" بك اخي عبدالكريم

اولا": - نصيحه أن يكون الحلال من نوع واحد والاختيار طبعا" لك

ثانيا":- بالنسبة لعدد(30) رأس يحتاج كيس شعير(50) كيلو يقسم على فترتين صبح - عصر الجت ايضا" عدد(2) % على فترتين

ثالثا":- مشرب الماء يفضل ابوعيا" وهنالك مطهرات خاصة بالعيادات البيطربة -
0
0
تقبل تحياتي

[عابره]

السلام عليكم ورحمة الله وبركاته
عندي بعض النصايح:-1-اذا اشتريت حلال جديد لا تحطه مع القديم اعزله لمده اقلها اسبوع وراقبه اذا زين ضيفه لحلالك وذلك منعا لانتشار المرض اذا كان مريضا
2-اعزل بعد العنز المريضه حتى تتشافى
3-لاتأكلهم وايد فيصابون بالسمنه ومن ثم يتأخر الحمل عندهم بسبب الدهون
4-حافض على المراح نظيفا
واما عن التيس العماني فممكن ان يلقح عارضيه وقد فعلها عندي مرتين......

[ابوجديع]

(( محمد عبدالكريم ))

ياهلا ومرحبا فيك ونورت المنتدي ..

أنا مع أخوي أبوناصرالقطري كلامه صحيح

أأخوك أأبوجديع

[لعديد]

يامرحبا بك في محلك وبين اخوانك والربع ماقصروا

[دخان]

موفق والله ايعينك

[Q_Q]

اظافه الى الي قالوه الاخوان انا من وجه نظري لازم اتطلعهم يومين يتمشون برى العزبه حتى لو مافيه شي تاكله يعني انا مثلا حاليا في الصيف افك الحلال اعلفه برى الساعه 3 العصر بعد مايخلص الحلال من عشاه اسوقه عن العزبه وهم خلاص تعودو عندي على مكان العزبه يعني مايحتاج لهم راعي يروحون ويرجعون بروحهم بس اهم شي تتاكد من المنطقه حولك مافيها مجمع قاذورات او اماكن تتجمع اكياس البلاستك بكثره لأن الخمول الزايد للحلال يكثر الامراض عليهم ويقلل فرص التلقيح بسبب تراكم الشحوم ويارت انك ماتشبعهم من الاكل يعني اتشوف كم ياكلون خلال 15 دقيقه من البرسبم هذا يكفيهم ومثلها بالشعير 10 الى 15 دقيقه على حسب سرعه اكل حلالك اهم شي ما يبقى شي عقب هذا الوقت هذا انسب علافه للحلال

هذا الي انا اسويه وكل واحد له نظره
تقبل تحياتي